FJKL mande Dwayen Tribinal Premyè Enstans Pòtoprens la nonmen yon lòt jij pou kontinye ankèt sou dosye Petrocaribe a
Nan yon kominike li mete deyò jounen vandredi 30 oktòb la, “Fondasyon Je Klere” (FJKL) di yon sous jidisyè fè l konnen manda jij enstriksyon ki sou dosye Petrocaribe a, Rammoncite Accimé fini depi 13 oktòb pase a. Sa lakòz Majistra a pa ka travay sou dosye a daprè FJKL. Poutèt sa, li mande Dwayen Tribinal Premyè Enstans Pòtoprens lan, Me. Bernard Sainvil pou li nome yon lòt majistra pou kontinye ankèt la.
FJKL ankouraje Dwayen an pou l nome pi vit yon nouvo majistra ki kapab kontinye ankete sou dosye a. Li swete tou majistra k ap nome a ap sou lis majistra sètifye Konsèy Siperyè Pouvwa Jidisyè a pibliye a yon fason pou evite reta ak move sipriz nan tretman dosye a.
FJKL fè sonje Kou Siperyè DèKont ak Kontansye Administratif te deja soti yon rapò odit ki gen twa pati sou jesyon Fon PetroCaribe k ap pèmèt popilasyon an jwenn repons ak kesyon “Kot Kòb Petrocaribe a? Jiskaprezan okenn moun ki gagote kòb petwo a poko ni arete, ni enkyete. Yo kontinye ap jwi byen yo detoune, piye ak vyole pandan genyen ki toujou nan fonksyon Piblik lan.
Yon lòt jij enstiksyon pou kontinye dosye a pra l montre volonte Jistis nan peyi a genyen pou reponn ak revandikasyon pèp ayisyen an nan kad dosye sila a.
