Direksyon Imigrasyon vle bay sitwayen ayisyen yo yon paspò elektwonik

Responsab yo nan Direksyon Imigrasyon anonse madi 27 oktòb 2020 an yo pral livre yon nouvo fòma paspò ki se “Paspò elektwonik”. Tout sa k ap fèt koulye a, li fèt a pati nimerizasyon. Jean Osselin Lambert enfòme gen yon òganizasyon entènasyonal ki rele OACI ki bay chak peyi direktiv sou fason yo dwe fè kat dokiman vwayaj yo ak fason pou yo kontwole yo.

Paspò elektwonik la se yon livrè ki genyen yon pis (puce) ladann k ap pèmèt ou li tout enfòmasyon ki genyen sou li. Mesye Lambert revele gentan gen dispozisyon ki pran pou otomatize kontwòl sou moun k ap vwayaje nan lemond antye. Pou Ayiti kapab reponn ak egzijans sa yo, gentan gen ekipman ki enstale nan tout fwontyè nan peyi a. Ekipman sa yo gen kapasite pou kapte mezi byometrik tankou figi ak anprent moun ki mèt paspò a. Apre sa y ap konpare done yo, si gen youn ki pa koresponn ak lòt, y ap konsidere moun sa tankou yon “Enpostè” oubyen yon kriminèl daprè Jean Osselin Lambert.

An menm tan, li fè konnen lè w gen paspò elektwonik la ou dwe konekte ak òganizasyon entènasyonal OACI ki gen yon pwogram ki mande pou voye tout done ki sou paspò ak pis sa yo ba li. Sa pral fòme “Siyati elektwonik”. Konsa lè yon moun ap pase nan yon fwontyè, y ap sèlman pase paspò a nan yon lektè byometrik k ap pèmèt yo verifye si paspò a bon ak si l pa bon.