Prezidan Jovenel Moïse rete 105 jou sou pouvwa a dapre Direksyon Politik Opozisyon an

Direksyon Politik Opozisyon Demokratik la (DIRPOD) di l konstate yon lòt fwa Prezidan Repiblik la Jovenel Moïse sot demontre nan dènye diskou li a, li pa mezire kouman move fason l ap gouvène peyi a plonje l pi plis nan yon kriz politik grav. Yon lòt fwa, menm jan li te fè l ak reprezantan Etazini an nan Nasyon Zini, chèf LETA a ap chèche mete pèp la nan erè lè l di li gen 3 mwa depi l ap negosye yon pwojè akò ak opozisyon an. Nan yon nòt li voye bay Impulse Web Médias, estrikti politik ki fòme DIRPOD la k ap batay lontan pou mete demokrasi a sou ray demanti deklarasyon prezidan Moïse la.

Daprè DIRPOD la, pa gen okenn akò k ap negosye avèk la prezidans. Mete sou sa, pa gen okenn pati ki manm DIRPOD la yo te kontakte ni ki te chita pale ak prezidan Repiblik la. Yon lòt bò, Direksyon Politik Opozisyon Demokratik la fè lokatè Palè Nasyonal la sonje li te prete sèman pou l respekte ak pou fè respekte konstitisyon an. Nan sans sa, li fè tèt li pase pou yon trèt epi li komèt yon krim ‘’haute trahison’’ lè l pretann li kapab chanje konstitisyon an li pran plezi ap pase anba pye.

Nan menm nòt la, DIRPOD ekri lè prezidan an fin deklare dwe gen yon lòt konstitisyon avan eleksyon yo fèt nan peyi a epitou nan demen li di yon lòt bagay se yon prèv anplis ki montre moun pa bezwen gen konfyans nan pawòl prezidan an. Modifikasyon ki dwe fèt nan manman lwa peyi a se youn nan gwo pwen ki genyen nan kalandriye Konferans Nasyonal.

Yon lòt bò, DIRPOD atire atansyon prezidan pou di l konstitisyon an pa ba li okenn lòt dwa gen sa ki prevwa pou li yo. Mete sou sa, atik 134.2 manman lwa peyi a di manda premye sitwayen nasyon an ap fini 7 fevriye 2021. Nan sans sa, olye pou l ap pase konstitisyon an anba pye, li t ap pi bon si prezidan an te pwofite 105 jou li rete sou pouvwa a pou restore otorite leta, fè sekirite retounen nan peyi a, fini ak kidnapin nan, pousuiv moun ki gagote lajan petwokaribe a ak ansasen ki te fè masak Lasalin, Bèlè, Kafou Fèy, ansasen ki te touye Batonye Monferrier Dorval, etidyan Gregory Saint Hilaire, Elias Eric Diogène anpil alyas Ricot ak anpil lòt ankò.

DIRPOD kwè gen nesesite pou tout demokrat ayisyen yo antann yo prese prese pou remete demokrasi a sou ray. Nan sans sa a, li enpòtan pou tout moun ki vle wè enstitisyon yo mache byen chita pale ansanm san pa gen maskay epi san retire pèsonn.