Ministè Jistis fè tout moun sonje ansyen kat idantifikasyon nasyonal la pa valab ankò

Ministè Jistis ak Sekirite Piblik, nan yon nòt li mete deyò jounen madi 20 oktòb la, fè tout popilasyon an sonje ansyen kat idantifikasyon nasyonal la pa valab ankò. Otorite yo pran desizyon sa daprè dispozisyon dekrè 18 jen 2020 an. Poutèt sa, li ankouraje tout sitwayen pou ale nan biwo Ofis Nasyonal Idantifikasyon (ONI) yo pou yo ka fè nouvo kat la, sa anpil moun rele kat Dermalog la.

Minis Rockfeller Vincent, an menm tan, fè popilasyon an konnen gouvènman an deja pran tout dispozisyon lojistik ki nesesè pou moun yo kapab fè kat la nan pi bon kondisyon. Daprè Minis la, se yon kat ki byen sekirize ki pral pèmèt chak sitwayen nan peyi a jwi epi egzèse dwa sivil ak politik yo.

N ap fè sonje depi vandredi 16 oktòb ki sot pase a, si yon moun pa gen nouvo kat la, ou p ap ka fè okenn tranzaksyon ak ansyen kat idantifikasyon nasyonal la daprè desizyon otoriye yo pran nan peyi a.