Etidyan ak Inivèsitè Tigwav yo mache pou mande jistis pou Grégory Saint-Hilaire

Sou inisyativ Kolektif Etidyan ak Inivèsitè Tigwav yo, plizyè sitwayen ak dirijan òganizasyon mache nan lari apre midi mèkredi 14 oktòb 2020 pou mande jistis pou Grégory Saint-Hilaire. Etidyan yo montre kè kase yo genyen poutèt pa gen sekirite nan peyi a. Moun ki t ap mache yo te genyen balèn limen nan men yo, yon siy daprè yo menm pou montre y ap klere chimen pou jwenn jistis pou defen an.

Youn nan Nòmalyen ki te nan menm pwomosyon ak Grégory lonje dwèt li sou minis levasyon an, Pierre Josué Agénor Cadet li di ki ta voye touye etidyan lekòl nòmal la. Richardson Pierre kritike minis la pou sa paske dapre li menm, Grégory Saint-Hilaire te sèlman ap reklame dwa li genyen pou l viv ak pou l travay tankou moun ki ale lekòl. Nòmalyen an deklare: “Gouvènman PHTK a etabli yon rejim diktatoryal, yon rejim sanginè, kriminèl ki pa janm sispann souse san popilasyon an. Jounen jodi a nou menm etidyan nan Tigwav nou leve vwa nou pou nou di se ase”.

Pwofesè Emmanuel Sanon ki t ap patisipe nan mach la deklare se tout sitwayen ki ta dwe antre nan batay k ap fèt nan peyi a jounen jodi a. Nòmalyen Siperyè a di Grégory Saint-Hilaire t ap goumen pou genyen yon lòt sosyete kote tout moun kapab jwenn menm edikasyon. Mèt Emmanuel Sanon deklare li kwè nan jistis peyi a kòm sèl ranpa pou tande vwa yo.

Sou bò pa yo, dirijan Mouvman pou Liberasyon Rejyon Gwavyèn nan (MOLIREG) bay garanti menm si anpil moun tonbe yo p ap fè bak. Mèt Augustin Pierre renouvle detèminasyon yo pou rele chalbare dèyè ekip ki sou pouvwa li di k ap simen dèy nan mitan popilasyon an. Pòt pawòl Sektè Demokratik la nan Tigwav deklare: “Prezans nou nan lari a se pou montre dezakò nou ak pouvwa PHTK a pa rapò ak moun y ap sasinen nan peyi a”. Mèt Pierre fè sonje yon inivèsite se yon kote ki sakre, se yon kote moun pa kapab vyole epoutan jounen jodi a menm inivèsite a pa epanye paske pouvwa PHTK a ap sasinen moun tout kote. Poutèt sa, militan politik la di pèsonn pa dwe fè silans. Daprè li menm si tout moun fè silans gen yon lè k ap rive pouvwa ap mache pran moun ata anba kabann lakay yo pou y al touye.

N ap fè sonje depi aprè zak sasinay ki fèt sou Grégory Saint-Hilaire nan lakou lekòl nòmal siperyè a, se chak jou Bondye mete gen yon sektè diferan k ap mande pou jistis fè limyè sou krim sa.