“Pèsonn moun pa an sekirite nan peyi a” daprè RANAMSA

Nan yon konferans pou laprès jounen mèkredi 7 oktòb la, Rasanbleman Nasyonal Madan Sara yo (RANAMSA), denonse fenomèn ensekirite a k ap taye banda nan peyi a kote Madan Sara yo ap tonbe pa pil nan mache kwabosal. Yo denonse tou lanmò etidyan Grégory St- Hilaire ki te yon pitit Madan Sara ki mouri anba bal lapolis nan dat 2 oktòb pase nan lakou lekòl Nòmal Siperyè a.

RANAMSA deplore, an menm tan, lanmò 2 kòdonatè yo genyen ki tonbe nan sid ak latibonit. Madan Sara yo envite tout sektè fè lapè paske daprè yo menm se nan chita pale youn ak lòt n ap rive jwenn solisyon pwoblèm ki genyen nan peyi a. Manm estrikti sa yo lanse yon kri nan zòrèy otorite yo pou peyi a chanje pou evite machann yo mouri tankou bèt. “Pèsonn moun pa an sekirite nan peyi a. Nou pa kapab ankò, nou bouke’’ se sa yo deklare.

Yon lòt bò, yo pwofite voye flè pou prezidan Repiblik la, Jovenel Moïse la poutèt to dola a ki fè yon ti bese sou mache a.

RANAMSA fè konnen li genyen 5 objektif:
1) Antreprann tout aktivite dirèk oswa endirèk ki kapab kontribye nan amelyorasyon kondisyon lavi tout antreprenè ti biznis nan peyi a pandan y ap mete plis aksan sou Madan Sara yo

2) Travay pou mete sou pye chanm kòmès sektè enfòmèl la ki se (C.K.S E) pou Madan Sara yo, atizan yo ak tout lòt ti machann oswa moun ki gen ti biznis kapab jwenn kredi ak lòt ankadreman.

3) Mete sou pye yon pwogram legal ak kole zepòl ekonomi nan enterè tout machann.

4) Fè aktivite fòmasyon ak entegrasyon sosyal, ekonomik ak kiltirèl pou fanm ki pa gen mwayen yo pandan y ap ensiste sou antreprenèz yo ak andikape yo.

5) Fè pwogram edikasyon sivik ki kapab ankouraje patisipasyon medam sa yo nan gouvènans peyi a.

Nan finisman konferans lan, medam yo deklare “Nou se lavi poutan se nou ki pi meprize”