Enspeksyon Jeneral Polis Nasyonal la mande moun ki ta viktim anba men polisye pou pote plent

Enspeksyon Jeneral Polis Nasyonal la ouvè 44 dosye pou mwa septanm nan, yo resevwa 29 plent epi gen 10 rapò entèn ki soti nan lòt enstans nan la polis daprè Marie Michelle Verrier. Nan yon konferans li bay jounen Lendi 5 oktòb, Enspektris Divizyonè a presize enspeksyon an te fè 5 sezin pou yon seri enfòmasyon kap sikile.

Soti nan mwa janvye pou rive nan septanm 2020 a, Enspeksyon an ouvè 475 dosye, yo poze 357 ak nan kad ankèt ki fèt yo, yo fè 140 konvokasyon, yo tande 118 moun, te gen 9 konfwontasyon ki te fèt, 18 misyon ankèt pou chèche enfòmasyon, 10 medyasyon pou kapab jwenn antant ant yon plenyan ak polisye, lè sa nesesè pou byen enstitisyon an. Enspektris Verrier rapòte tou gen 12 chèk enspeksyon jeneral la te kenbe, te gen 11 polisye ki te plase anba mezi konsèvatwa pami yo gen 8 yo te fini ak mezi konsèvatwa ki te genyen kont yo a.

Enspeksyon jeneral la te delivre 6 atestasyon, gen 9 polisye yo te mete nan izolman sa vle di yo te ekate yo, gen 7 ladan yo se te pou kanbriyolaj, youn pou koripsyon epi lòt la poutèt li touye moun (homicide). An menm tan, li eksplike gen 12 polisye yo mete fen nan mezi izolman ki te pran kont yo.

Pou dosye ki degre nan lajistis, Marie Michelle Verrier fè konnen te genyen 4, gen 47 rapò ankèt ki siyen epi al jwenn Direksyon jeneral PNH la. Pou koulye a gen 47 dosye li trete pou mwa septanm nan nan Enspeksyon jeneral PNH la pou mwa septanm nan. Sepandan soti nan mwa janvye pou rive nan mwa septanm gen 229 dosye ki siyen nan enstitisyon sa epi al jwenn Direktè jeneral la.

Konsènan rekòmandasyon ki fèt yo, Enspektris la presize se 121 pou soti nan mwa janvye pou rive nan mwa septanm. Gen yon revokasyon ki fèt pandan mwa septanm nan, 8 mizan disponibilite, 13 sispansyon, yon avètisman, 4 blam, 32 dosye klase ak 6 polisye transfere.

Pi lwen, Enspektris Verrier revele gen 2 dosye ki rete ouvè jiskaske pitit polisye a gen laj majorite, gen 3 dosye ki ale nan tribinal premyè enstans, genyen 2 dosye enspeksyon an mande Direksyon Santral Polis Jidisyè (DCPJ/DSPJ) a pou aji sou yo epi genyen 21 lòt rekòmandasyon ki fèt pou moun ki touye moun, koripsyon, moun ki gen zam ki pa legal. Konsa tou gen 13 lòt rekòmandasyon ki fèt pou neglijans grav, menas ak yon lòt pou vyolans konjigal.

Enspeksyon jeneral Polis nasyonal la ankouraje tout moun ki ta viktim anba men yon polisye pou pote plent epi yap fè suivi sou dosye yo.