Atak gang : Wilner René mande entèvansyon Leta nan komin Akayè pou pote sekou bay deplase yo

Ansyen kandida pou pòs Depite komin Akayè, Wilner René drese yon tablo nwa kou lank sou sitiyasyon deplase Akayè yo ki epapiye nan divès abri pwovizwa nan komin nan. Militan politik la mande Leta pou pote asistans bay moun sa yo kap viv nan yon kondisyon trè difisil apre atak repete nèg ak zam yo sou Site Drapo a.

Deplase komin Akayè yo ap viv nan yon sitiyasyon ki makawon anpil daprè deklarasyon Wilner René sou Radio Caraïbes. Natif Akayè a mande leta pote sekou bay divès moun ki epapiye nan 50 abri pwovizwa nan nivo Komin nan. Wilner René souliye deplase yo nan difikilte pou jwenn manje, dlo ak laswenyaj. Anpil moun mouri akoz yo pa ka jwenn medikaman paske famasi ak lopital yo ki fèmen nan rejyon an. Ansyen kandida mande entèvansyon divès enstitisyon nan leta Ministè Afè Sosyal ak Travay, FAES, ak pwoteksyon sivil pou vini pote kichòy pou deplase yo dekwa pou grangou pa touye yo.

Aktivis politik la fè konnen tou gen anpil moun ki al jwenn fanmi yo, gen lòt tou ki paka ni monte ni desann se sitiyasyon moun sa yo ki pi difisil apre dènye atak nèg ak zam kowalisyon Viv Ansanm sou Komin Akayè.

Kèk semèn apre atak la lekòl toujou poko fonksyone nan komin nan. Gras ak prezans lapolis nan tèt kole ak kowalisyon rezistans Akayè a gen yon kalm sou komin nan . Sepandan otorite yo toujou mande popilasyon an pou toujou gade vijilans yo.

pascalfleuristil2018@gmail.com