Paret Hospitality Group S.A bay Digicel 30 jou pou retire kab li yo nan Kaliko Beach Club

Nan yon dosye ki pa sispann pran ekstansyon depi kèk ane, Paret Hospitality Group S.A., pwopriyetè Kaliko Beach Club, egzije Digicel pou li retire kab fib optik li yo sou tè Kaliko a, kote konpayi an di gen yon “okipasyon abizif” ak “iregilye” nan pwopriyete li. Daprè konpayi an, yon akò te siyen 8 Jiyè 2020, men Digicel pa respekte kondisyon yo. Prezidan Konsèy Administrasyon Paret Hospitality, Emmanuel F. Paret, lanse yon iltimatòm kote li bay Digicel jiska 29 novanm 2024 pou satisfè demann sa.

Dapre deklarasyon M. Paret, si Digicel pa pran prekosyon pou retire ekipman yo sou teren Kaliko a nan dat sa, yo pral fè fas ak menas pwosè legal kote Paret Hospitality pare pou retabli tout kontwòl sou espas sa a.

M. Paret ensiste pou montre malgre anpil efò yo te fè pou jwenn yon solisyon zanmitay, pasyans konpayi an kòmanse febli akòz defisi. Si Digicel pa pran mezi nesesè, Paret Hospitality gentan pare pou pran chimen legal la, san li pa sispann fè apèl pou Digicel aji avèk “diligans rezonab”.

Gen moun ki kwè konfli sa ka gen gwo konsekans sou itilizatè rezo Digicel yo, tankou sa ki te fèt nan mwa septanm dènye a. Malgre defi sa yo, Paret Hospitality swete ka jwenn yon solisyon k ap evite yon “batay jidisyè long”.

Poko gen reyaksyon ofisyèl bò kote Digicel sou nouvo demand sa a. Silans sa a kite anpil dout sou yon posib rezolisyon konfli a, pandan divès sektè ap tann pou wè si Digicel ap pran etap ki nesesè pou anpeche pwoblèm nan agrave plis pase sa li deja ye.

pascalfleuristil2018@gmail.com