Konbit Wiki Kreyolo : yon inisyativ Wikimedia Ayiti pou mete plis konesans disponib nan lang kreyòl ayisyen
Soti 15 oktòb pou rive 30 novanm 2024, gwoup itilizatè Wikimedia Ayiti ap òganize twazyèm edisyon Konbit Wiki Kreyolo. “Plis konesans nan lang kreyòl ayisyen, plis aksè pou tout moun” se tèm ane sa pou konbit la. Aktivite sa antre nan kad yon kanpay Wikimedia Ayiti te lanse an 2022 pou ranfòse prezans lang kreyòl ayisyen sou entènèt, sitou sou platfòm Wikimedia yo, tankou Wikipedya. Avèk kanpay sa, Wikimedia Ayiti vle ogmante kantite kontni sou ansiklopedi lib la pou plis konesans disponib pou kreyolofòn yo.
Nan premye edisyon an ki te òganize an 2022, te gen 130 moun ki te patisipe. Gras ak patisipasyon sa a, nou te rive kreye plis pase 350 atik epi modifye plis pase 2 000 atik sou Wikipedya ki gen rapò ak istwa ak jewografi Ayiti. Nou te kreye, ajoute, ak tradui plis pase 2 000 deskripsyon, 229 deklarasyon, ak 1 231 etikèt sou Wikidata.
Pandan menm peryòd sa a, nou te kreye ak modifye plis pase 3 000 mo kreyòl ayisyen sou Wiksyonè epi ajoute 700 fichye sou Wikimedia Commons. Atelye sa yo te òganize nan Tigwav, Ench, Jakmèl, Pòtoprens, ak anliy.
Jiskaprezan, vèsyon kreyòl ayisyen ansiklopedi a toujou nan premye faz li. Malgre jefò anpil kontribitè depi kèk lane, sa poko sifi. Li mande plis volontè pou vin pote kole, kèlkeswa domèn etid oswa travay yo. Sa pa mande okenn gwo konpetans nan enfòmatik ni gwo nivo etid. Sa ki enpòtan se pataje tout konesans pou mete yo disponib gratis pou tout moun nan mond lan nan kreyòl ayisyen. Sepandan, li esansyèl pou itilize referans ki fyab e ki ka verifye.
Plizyè atelye deja planifye pou twazyèm edisyon Konbit Wiki Kreyolo a. Nan Ench, ap gen yon atelye 26 oktòb; Wiki Klèb Jakmèl deja pare pou òganize atelye soti 26 pou rive 27 oktòb la. Pandan n ap tann Wiki Klèb Uniq chwazi dat pa li, ap gen atelye nan Wiki Klèb Tigwav la 9 novanm 2024.
N ap souliye ke Wikipedya se editè volontè ki ekri li, epi Wikimedia Foundation òganize li. Se yon òganizasyon san enterè ki sipòte tou yon seri lòt pwojè volontè. Jodi a, nan moman atik sa a te ekri, Wikipedya an kreyòl ayisyen an genyen 69 830 atik, 34 168 kontribitè, pami yo gen 51 kontribitè aktif ki deja anrejistre ak 2 administratè.
