Enspeksyon sou 13 000 nouvo ban lekòl : FNE angaje pou amelyore aksè ak edikasyon nan Peyi a
Nan yon vizit enspeksyon ki fèt vandredi 18 oktòb 2024, Direktè Jeneral Fon Nasyonal pou Edikasyon (FNE), Mesye Jean Ronald Joseph, vizite yon depo ki nan lokal Sosyete Nasyonal Pak Endistriyèl yo (SONAPI). Depo sa a sere 13 000 nouvo ban ki pral distribiye nan plizyè lekòl atravè tout peyi a pou fasilite pi bon kondisyon ak ledikasyon . Ban sa yo, ki finanse pa FNE, koute Leta anviwon 346 milyon goud, dapre deklarasyon nimewo 1 enstitisyon an .
Mesye Yves Roblin, ki se Direktè Jeneral Ministè Edikasyon Nasyonal ak Fòmasyon Pwofesyonèl (MENFP), te akonpanye Direktè Jeneral FNE a pandan vizit la . Jean Ronald Joseph eksplike inisyativ sa a vize pou ogmante kapasite lekòl yo nan tout peyi a. “Jodi a, ansanm ak direktè jeneral MENFP a, nou enspekte 13 000 nouvo ban FNE finanse pou ogmante kapasite lekòl nan peyi a.” n’ap li sou kont X Direktè Jeneral FNE a.
Dapre enfòmasyon Jean Ronald Joseph te bay nan prezans jounalis yo, gen plizyè depatman ki deja resevwa yon pati nan nouvo ban sa yo. “Depatman Nò a deja resevwa 2500 ban pandan 1000 ban deja livre nan Plato Santral. Li asire distribisyon an pral kontinye nan tout depatman yo pou reponn ak bezwen edikasyonèl peyi a.
Anplis de sa, Jean Ronald Joseph fè konnen inisyativ sa yo posib gras a kontribisyon dyaspora ayisyen an, espesyalman atravè taks 1 dola 50 sou apèl entènasyonal ak transfè lajan ki soti aletranje. FNE, ki te kreye nan lane 2017, gen pou misyon pou fasilite aksè ak edikasyon pou tout moun epi jere lajan ki dedye a sektè edikasyon an ki se yon sektè kle pou devlopman peyi a.
pascalfleuristil2018@gmail.com
