218e anivèsè asasina anperè Jean-Jacques Dessalines: Yon jounen refleksyon ak onè pou Papa nasyon an
Nan okazyon 218yèm anivèsè lanmò trajik Papa fondatè nasyon ayisyen an, Jean-Jacques Dessalines, ke yo te rele Jacques 1er, Biwo Òganizasyon Jèn pou Nasyon Zini Lafrik an Ayiti (BOJNUAH) gen onè pou li onore memwa gran lidè sa a, ki te fè yon kontribisyon enpòtan nan listwa limanite, espesyalman Ayiti.
Dessalines, ki te fèt 20 septanm 1758, epi ki mouri asasinen 17 oktòb 1806, te reprezante liberasyon ak dwa fondamantal moun atravè abolisyon esklavaj ak komès esklav yo. Jean-Jacques Dessalines pa t yon ewo pou Ayiti sèlman; li te yon jeni militè e yon defansè dwa moun anvan menm konsèp sa a vin popilè.
Gran Mèt sa a, ki gen yon dimansyon mondyal, te kontribye pou fè Ayiti vin premye repiblik nwa endepandan nan mond lan , li te montre kolonizatè yo ke libète moun pa t yon rèv, men yon reyalite. Li make lespri nou ak bravou li, ak inisyativ li pou mennen revolisyon an jiskaske peyi a vin endepandan premye janvye 1804.
Ekselans Mesye Amos Cincir, Reprezantan Espesyal BOJNUAH, te deklare ke Ayiti rete yon gran nasyon malgre tout difikilte ak kriz yo, ki se pi gwo imilyasyon peyi Papa Dessalines la ap konfwonte depi lontan. Li envite tout Ayisyen pou yo aprann plis sou Jean-Jacques Dessalines epi kontinye swiv ideyal Papa fondatè nasyon ayisyen an.
Malgre pwoblèm Ayiti ap travèse jodi a, inite nan divèsite ta dwe drapo ki pouse nou pou nou rebati peyi a, ki te yon fwa “Pèl Zantiy yo.” Yon konsyans kolektif ap pèmèt nou fè aksyon konkrè pou byen peyi nou, Ayiti.
Depi me 2017, Biwo Òganizasyon Jèn pou Nasyon Zini Lafrik an Ayiti (BOJNUAH) ap travay kòm yon enstitisyon desantralize ki soti nan Biwo Pèmanan Òganizasyon Jèn pou Nasyon Zini Lafrik (OJNUA), ki gen sant li nan Ouagadougou, Burkina Faso (Lafrik Lwès). Plizyè peyi sou kontinan Afriken an se manm deja, tankou Burkina Faso, Tchad, Gine Conakri, Kamewoun, Zanbi, Repiblik Demokratik Kongo, Senegal, Benen, Kotdivwa, Angola, Mali, ansanm ak lòt kominote nwa atravè lemond, tankou Ayiti.
Sa a se yon apèl pou tout Ayisyen ranfòse konsyans yo sou eritaj papa nasyon an ak pou yo travay nan tèt kole pou yon Ayiti pi solid, pi ini, ak pi pwospè.
pascalfleuristil2018@gmail.com
