Arcahaie : Vyolans gang yo lakoz 4,674 moun kite kay yo, daprè OIM

Nan dènye semèn ki sot pase a, gwoup ame ki t ap simaye latèrè nan komin Akayè te fòse 4,674 moun abandone kay yo, dapre enfòmasyon Òganizasyon Entènasyonal pou Migrasyon (OIM) te bay. Moun sa yo ki deplase yo divize an 1,067 fanmi epi yo chèche refij nan diferan zòn nan komin nan pou yo jwenn sekirite.

Pami moun deplase sa yo, 57% jwenn abri kay fanmi ak zanmi, pandan 43 pousan rete nan twa espas pwovizwa kote yo resevwa moun k ap chape anba vyolans lan. Nivo vyolans ak ensekirite ki ap ogmante nan zòn sa a mete komin Akayè nan yon sitiyasyon difisil ak grav chak jou pi plis.

Nan nivo nasyonal, plis pase 700,000 moun deja deplase ann Ayiti akòz vyolans ame, kote timoun yo afekte pi plis nan kriz sa a. Selon OIM, gen yon ogmantasyon 22 % nan kantite deplase andedan peyi a depi mwa Jen. Sa montre jan kriz imanitè sa a ap vin pi grav chak jou epi jan li mande repons ijan ak apwopriye.

Kounye a, sitiyasyon an rete kritik pou plizyè milye moun k’ap chache kote ki pi an sekirite. Gouvènman ak òganizasyon imanitè yo dwe travay ansanm pou adrese pwoblèm sa a epi ede fanmi yo jwenn asistans nesesè pou viv ak diyite.

pascalfleuristil2018@gmail.com