Eksplozyon yon kamyon sitèn nan nò Nijerya touye pou pi piti 140 moun
Yon eksplozyon kamyon sitèn touye omwen 140 moun nan eta Jigawa, nan nò Nijerya, selon otorite sekou yo, mèkredi 16 oktòb la daprè enfòmasyon AFP pibliye. Dènye aksidan sa a, ki enplike yon machin transpò gaz, rive nan yon moman kote pri gaz la monte anpil. Apre aksidan an ki te fèt madi swa, anpil moun te eseye ranmase gaz ki te koule sou wout la. Selon Lawan Shiisu Adam, yon pòtpawòl polis, kamyon sitèn lan te eseye evite yon lòt kamyon nan zòn Majia.
Lè aksidan an te pase, anpil abitan te rasanble alantou kamyon an pou pran gaz ki t ap koule sou wout la ak sou bò wout la. Pòtpawòl la di polisye yo te eseye anpeche moun yo pran gaz la, men foul la te repouse yo. Asosyasyon Medikal Nijerya mande doktè pou yo al ijan nan lopital yo pou ede nan tretman viktim yo ki blese.
An septanm pase, yon eksplozyon te fèt apre yon kamyon-sitèn te kolizyon ak yon kamyon ki te pote bèt nan eta Niger, kote li te touye omwen 59 moun, dapre otorite yo. Nijerya, ki se peyi ki gen plis moun nan Lafrik, konnen anpil aksidan sou wout li yo, sitou ak kamyon sitèn. Komisarya Federal Sekirite Wout (FRSC) te konte 1,531 aksidan kamyon sitèn nan 2020, ki te lakoz 535 moun pèdi lavi yo. Aksidan sa yo pa sèlman lakoz pèt lavi ak materyèl, men yo gen gwo konsekans sou anviwònman an akoz gaz ki koule sou tè a.
Eksplozyon sa yo rive regilyèman tou pre enfrastrikti petwòl nan sid peyi a, sitou akòz pratik ilegal ki vize pran gaz nan tiyo yo. Kounye a, gaz tounen yon pwodwi ki ra anpil pou Nijeryen yo, akòz kriz ekonomik peyi a ap travèse, ki pi grav nan 30 dènye ane yo. Pri gaz la ogmante senk fwa depi desizyon Prezidan Bola Ahmed Tinubu te pran ane pase pou retire sibvansyon gaz yo. Semèn pase, pri gaz nan ponp yo te monte ankò, jis yon mwa apre yon lòt gwo ogmantasyon.
pascalfleuristil2018@gmail.com
