Nan batay ant KPT ak Primati pou montre sa k gen pi gwo kòlèt, pèp la menm egzile nan pwòp peyi li

Finalman pa gen okenn enstitisyon andann peyi a ki gen valè. Dirijan ki nan tèt leta yo afiche yon seri konpòtman ou ta di se lè 2 matlòt rankontre nan lari, youn ap tire toya sou lòt. Mesye dam ki rele tèt yo otorite oubyen dirijan yo pa menm panse ak mizè pèp la kap depafini tankou yon kaw. Mete sou lamizè kap dechalbore yo , atoufè ak zam tanzantan ap fè yo kouri kite kay yo anpil nan yo san destinasyon. Gen fanm ak tifi yo oblije kouche ak responsab Sant ebèjman pou jwenn manje dekwa pou grangou pa fini ak yo. Donk, pèp Ayisyen an egzile nan pwòp peyi li.

Sikonstans lan mande tèt ansanm pou sove diyite peyi sa ki fin pase twòp anba pye. Nan goumen pou pouvwa okenn peyi pa respekte nou, pa egzanp Repiblik Dominikèn pwofite imilye nou kote y ap mare migran Ayisyen tankou sadin pou voye lakay. Gen Minis Zafè Etranjè Peyi Dayiti a Dominique Dupuy k ap chèche solidarite kominote entènasyonal pou mande Repiblik Dominikèn kanpe sou move ajisman li yo. Sa bay gwo bouch gonfle nan mitan Konsèy Prezidansyèl Tranzisyon an , Kote Prezidan KPT a Leslie Voltaire mande pou koupe tèt Chanselyè a pa gen okenn vwa ki leve pami lòt konseye Prezidan yo. Dayè gen 3 ladan yo ULCC mande lajisitis mete men nan kòlèt yo pou dwèt long Siperyè, yo mete yo tou piti pou moun ka bliye non yo se Emmanuel Vertilaire, Louis Gérald Gilles ak Smith Augustin, se twa konseye Prezidan mèt dam sa yo ki te mande Prezidan Konsèy Bank Nasyonal Kredi a 100.000.000 goud ak lòt avantaj pou yo te ka kenbe l nan pòs li.

Moun sa yo pa sousye sou mizè pèp la , dayè nan dosye Repiblik Dominikèn nan yo mete tèt yo ansanm pou yo anpeche Minis Dupuy rantre nan « Villa d’accueil ». Kòm reyaksyon plizyè minis menase pou yo pa mete pye yo nan okenn Konsèy minis yo depi twa konseye dwèt long siperyè sa yo ap la. Donk si sa fèt, leta ap bloke. Kòm Primati ak Palè Nasyonal pa tap regle anyen, ebyen bandi ap kontinye mache sou fyèl pèp la paske pa gen okenn pwojè pou sosyete a. Se jis batay pou fè lajan epi montre ki nèg ak fanm ki gwo chèf nan peyi a epi ki genyen pi gwo blan dèyè yo.

Antouka, batay pou lòt Ayiti a p ap ka fèt ak modèl klas politik san santiman diyite nasyonal la.

pascalfleuristil2018@gmail.com