Pozisyon Minis Afè Etranjè Peyi Dayiti kont move ajisman otorite Dominiken kont migran Ayisyen yo deranje Prezidan KPT Leslie Voltaire

Prezidan konsèy Prezidansyèl Tranzisyon Leslie Voltaire mande Premye minis Tranzisyon Garry Conille pou revoke Minis Zafè Etranjè Peyi Dayiti a Dominique Dupuy daprè enfòmasyon Radio Télé Métronome pibliye jounen madi 15 oktòb 2024 la.

Apenn rive nan tèt Konsèy Prezidansyèl Tranzisyon an ,Leslie Voltaire kòmanse ap mete grif li deyò. Reprezantan Lavalas nan Konsèy la estime pozisyon Minis Zafè Etranjè Peyi Dayiti a Dominique Dupuy ap pran kont Repiblik Dominikèn yo twò radikal. Nan sans sa, Prezidan KPT a mande pou koupe tèt Chanselyè a. Daprè enfòmasyon Radio Télé Métronome pibliye, Achitèk la gentan gen yon moun nan pòch li pou mete ranplase madam Dupuy, se Direktè Kabinè KPT, Harvel Jean-Baptiste, Leslie Voltaire ap Jofre pou vin nan tèt Ministè Zafè Etranjè ak Kilt yo.

Daprè anpil obsèvatè,Leslie Voltaire pwofite ap regle koze l ak Minis la nan kad desepsyon li te pran nan 79èm Asanble Jeneral Nasyonzini yo nan Washington nan mwa septanm pase a.