Ayiti-Foutbòl: Grenadye yo tou prè Kalifikasyon dirèk yo pou Gold Cup 2025 la gras ak dezyèm viktwa yo kont Aruba
Nan dezyèm match nan fenèt FIFA mwa oktòb la, seleksyon nasyonal ayisyen an, Grenadye yo, te montre ankò fòs yo lè yo te bat ekip Aruba a ak yon skò 5-3. Apre yon premye viktwa 3-1 kont Aruba vandredi pase, ekip la, ki anba direksyon Sébastien Migné, kontinye ap avanse sere pou ranmase pwen enpòtan nan Konpetisyon Nasyon CONCACAF la.
Match la te kòmanse byen difisil pou Ayiti. Aruba te louvri skò a nan 14yèm minit gras ak Rovien Ostiana. Men, Danley Jean Jacques te reponn imedyatman nan 16yèm minit pou mete skò a 1-1. Ostiana te fè yon lòt gòl nan 20yèm minit pou redonn avantaj la bay Aruba, men Louicius Deedson te egalize anvan mi-temps lan nan 42yèm minit, mete skò a 2-2.
Nan dezyèm mitan match la, Grenadye yo te pran kontwòl jwèt la. Duckens Nazon te make yon gòl sou penalty nan 66èm minit, ki te mete Ayiti devan pou premye fwa nan match la. Fafa Picault te ajoute yon lòt gòl nan 78èm minit, e Frantzdy Pierrot te fini ak yon lòt penalty nan 89èm minit, sa ki te asire viktwa konplè Ayiti. Malgre Aruba te make yon twazyèm gòl nan 78èm minit gras ak Jayden Kruderof, sa pa t anpeche Grenadye yo genyen match la ak yon skò final 5-3.
Avèk viktwa sa a, Ayiti ap pwoche plis nan objektif yo pou retounen nan Lig A a epi pou asire plas yo dirèkteman nan Gold Cup 2025 la. Gen 2 lòt match ki rete pou novanm kont Matinik, kote yo gen yon sèl pwen pou ranmase pou konfime kalifikasyon an.
pascalfleuristil2018@gmail.com
