Pò Entènasyonal Pòtoprens lan pral relouvri vandredi 18 oktòb 2024 ak mezi sekirite ranfòse

Daprè yon nòt ki soti nan men Direktè Jeneral Autoritè Portuaire Nasyonal (APN), Mesye Jocelin Villier, enstalasyon yo nan Pò Entènasyonal Pòtoprens pral relouvri ofisyèlman vandredi 18 oktòb 2024. Desizyon sa a vini apre kèk mwa aktivite yo te sispann akoz pwoblèm sekirite ak lòt defi lojistik.

Nan nòt sa a, APN anonse yon seri mezi sekirite ki pral mete an plas pou garanti operasyon yo fèt san pwoblèm epi pwoteje tout moun k ap travay ak frekante pò a. “Nou pran tout dispozisyon nesesè pou asire sekirite moun ak machandiz yo,” se sa Jocelin Villier deklare.

Mezi sekirite ranfòse
Pou asire pò a fonksyone nan bon kondisyon, APN deside mete plis kamera siveyans, ogmante kantite fòs sekirite ak ranfòse pwosedi enspeksyon an. Yo pral fè tout efò pou machandiz yo rive san danje epi an tan. Anplis de sa, fòmasyon espesyal ap fèt pou tout anplwaye ak ajan sekirite yo pou asire yo konnen kijan pou jere tout sitiyasyon ijans ki ka rive.

Relouvèti Pò Entènasyonal Pòtoprens lan se yon gwo avans pou ekonomi peyi a, jan pò a reprezante yon estrikti enpòtan pou aktivite komès ak echanj machandiz nan peyi a. Dapre direktè APN lan.

Pandan mezi ranfòsman sekirite sa yo ap pran fòs, APN ap kolabore ak lòt otorite tankou lapolis ak fòs sekirite prive pou asire yon prezans kontinyèl epi redwi risk yo.

Relouvèti Pò Entènasyonal Pòtoprens lan pral pèmèt antrepriz yo, osi byen ke lòt patnè entènasyonal, rekòmanse operasyon yo epi fè peyi a reprann rit nòmal komèsyal li.

pascalfleuristil2018@gmail.com