Pòtoprens: Gen manm komite nan kan deplase yo ki egzije medam yo fè sèks ak yo pou jwenn kit alimantè

Yon atik ki pibliye nan jounal an liy AyiboPost, ki pote siyati Jounalis Rebecca Bruny, fè konenn nan plizyè kan deplase vyolans gang yo nan kapital la, gen manm komite pami yo kan Lise Marijàn ki fòse jenn fi pou fè sèks ak yo, sinon yo pap jwenn kit alimantè ou ijyenik òganizasyon voye pou yo.

Pami estrateji manm komite sa yo itilize lè kit yo vini, se kreye gwo dezòd epi apre pou fè konnen yo pap kapab kontinye ak distribisyon yo nòmalman, daprè sa kèk jèn fi esplike ak jounal nou sot site a. Fas ak sitiyasyon sa , anpil jèn fi oblije aksepte demann pou kouche ak manm kominite yo, yon fason pou asire yap jwenn kit . Lòt ki pa dakò koube anba kondisyon sa , oblije achete kit la nan men responsab komite yo.

Nan sitiyasyon sa menm granmoun ki gen 50 lane pa epanye anba prensip manm komite yo nan kan deplase sa yo. Granmoun ki pa entèrese mesye komite yo pou kesyon sèks, pa gen lòt chwa se achte kit la, kote pri yo varye depann de kisa ki anndan l.

Toutfwa, gen kan deplase bandi ak zam yo pran kontwòl yo nan kapital la , kote se yo ki deside kòman distribisyon kit yo dwe fèt, kiyès ki dwe resevwa ak kiyès ki pa dwe resevwa, toujou daprè atik la.

Daprè otè atik la, Rebecca Bruny ki tap pale sou radyo Karayib maten mèkrèdi 9 oktòb 2024 la, gen òganizasyon lè yap pote èd bay deplase yo, ki oblije negosye ak bandi pou kite yo rive nan espas kan yo.