PNH entansifye operasyon kont gang yo nan Latibonit epi demanti rimè bandi ki ta fè kwè gen polisye ki viktim

Semèn pase a, Pont-Sondé te tranble anba atak san pitye gwoup gang ame ki lakoz plis pase 70 moun mouri nan popilasyon sivil la. Pou reponn avèk fòs ak detèminasyon, plizyè inite nan Polis Nasyonal la, tankou BOID, SWAT, UTAG, BIM, UDMO, ak BI, lanse gwo operasyon nan depatman Latibonit pou kwape gang yo.

Gen enfòmasyon ki t ap sikile sou rezo sosyal yo ki fè konnen gen polisye ki ta mouri pandan operasyon sa yo. Men, nan yon nòt PNH fè soti nan dat madi 8 oktòb 2024, li demanti enfòmasyon sa yo.

Enstitisyon an fè konnen operasyon yo ap byen dewoule nan lokalite Joanis, toupre La Croix-Périsse. Selon nòt la, operasyon yo deja kòmanse bay rezilta pozitif pandan y ap travay di pou mete fen nan zak vyolans gang yo.

PNH lan fè konnen li deside kontinye travay san pran souf pou mennen lapè ak sekirite nan zòn nan. Yo mande popilasyon an pou li pa koute rans ni koute rimè bandi yo ap fè kouri nan peyi a.

pascalfleuristil2018@gmail.com