Anbasadè Gandy Thomas denonse depòtasyon masiv ak fòse migran ayisyen nan Repiblik Dominikèn nan OEA

Nan yon reyinyon ekstraòdinè Konsèy Pèmanan Òganizasyon Eta Ameriken yo (OEA) ki fèt madi 8 oktòb 2024, Anbasadè Gandy Thomas fache kont kondisyon depòtasyon masiv ak fòse migran ayisyen nan Repiblik Dominikèn, ki kont prensip fondamantal ak diyite moun. Se Misyon Pèmanan Ayiti ki mande reyinyon sa an ijans sou lòd Minis Zafè Etranjè Dominique Dupuy, apre Repiblik Dominikèn kòmanse mete an aplikasyon plan ki vize depòte 10 000 moun chak semèn.

Anbasadè Thomas denonse aksyon sa yo kòm yon vyolasyon dwa moun ak diyite migran ayisyen, pandan li mande kominote entènasyonal la pou ede Ayiti jere sitiyasyon difisil sa a. Dapre li, fason otorite dominikèn yo ap aji a pa respekte pwotokòl ak angajman entènasyonal yo te pran pou yo trete moun ak respè epi diyite.

Minis Zafè Etranjè a, Dominique Dupuy, fè konnen Ayiti pa ka rete bouch fèmen pandan sitiyasyon sa ap devlope a. Li mande pou konsèy la pran desizyon rapid pou pwoteje dwa migran ayisyen yo epi mete presyon sou Repiblik Dominikèn pou sispann depòtasyon ilegal sa yo ki mete lavi anpil moun an danje.

Reyinyon an te vize rasanble sipò lòt peyi manm OEA yo pou fè presyon diplomatik sou Repiblik Dominikèn pou yo respekte angajman yo pran ak lwa entènasyonal sou kesyon migrasyon.

pascalfleuristil2018@gmail.com