Ayewopò Tampa fèmen pandan pasaj Siklòn Milton, Prezidan Biden lanse apèl evakyasyon rapid

Nan apremidi madi 8 oktòb la, Prezidan Etazini, Joe Biden, pase lòd pou moun ki abite nan zòn ki sou wout siklòn Milton nan Florid evakye lakay yo touswit. “Se yon kesyon lavi ak lanmò,” li deklare.

Siklòn Milton, ki konsidere kòm “ekstrèmman danjere”, klase nan kategori maksimòm lan. Dapre previzyon yo, li dwe frape tè Florid ant mèkredi ak jedi. Florid te deja sibi gwo dega ak pasaj siklòn Hélène nan fen mwa septanm. Sant Nasyonal Ouragan (NHC) te rapòte lendi 7 oktòb la Milton te monte nan kategori 5 an yon sèl kou, avèk van kap bat jiska 250 km/lè.

Siklòn nan ap avanse soti nan sidès ale nan nòdwès nan Gòlf Meksik la, li prevwa frape Florid nan mitan lannwit mèkredi a. Dapre NOAA, kèk zòn nan Florid kapab inonde, van ak lapli ki ka detwi tout sa yo jwenn sou wout yo. Selon previzyon, Milton ka fè plis dega pase sa Hélène te fè a, e lapli pral tonbe anpil nan Florid, espesyalman nan vil Tampa. Ayewopò entènasyonal Tampa prevwa pou fèmen depi 9 è nan maten.Gouvènè Florid la deklare eta ijans fas a menas la.

Prezidan Biden avèti: “Se yon kesyon lavi ak lanmò”. Mesaj evakyasyon yo ap miltipliye nan Florid anvan Milton rive. Prezidan an di se ka “pi move tanpèt” ki frape Florid nan ” syèk sa”. “Fòk nou evakye kounye a, se lavi nou ki an danje,” li di.

Vis-Prezidan Kamala Harris mande popilasyon an pou swiv konsèy otorite lokal yo. Majistra vil Tampa, Jane Castor, avèti: “Si ou chwazi rete nan zòn evakyasyon yo, w ap mouri,” se sa li deklare sou CNN. Mezon Blanch fè konnen Prezidan Biden anile vizit li te gen nan peyi Almay ak Angola nan fen semèn nan pou l ka jere kriz sa.

Siklòn Milton se dezyèm kategori 5 depi sezon siklòn lan te kòmanse, apre siklòn Béryl. NOAA te avèti depi nan fen me a sezon siklòn sa pral an mouvman , ak posiblite pou kat a sèt siklòn kategori 3 oswa plis.

Pou raple, Milton ap menase Florid mwens pase 2 semèn apre pasaj Hélène, ki te fè gwo dega nan sidès peyi a. Siklòn sa te touye pou pi piti 230, pami yo 15 nan Florid. Sa fè Hélène tounen siklòn ki te pi mòtèl nan peyi Etazini depi Katrina an 2005.

pascalfleuristil2018@gmail.com