OJNUA ak manb li yo pote tout solidarite bay Ayiti apre desizyon gwogonm Repiblik dominikèn pran pou depòte 10.000 Ayisyen chak semèn

Biwo pèmanan Òganizasyon Jèn Nasyonzini Afrik ki gen sig nan Lang Fransè (OJNUA) eksprime endiyasyon li apre desizyon ki pran bò kote otorite nan Leta Dominiken pou depòte chak semèn 10.000 Ayisyen. Òganizasyon an mande tout enstans kontinantal, rejyonal ak entènasyonal sitou sa kap defann dwa moun yo pou panche sou zak vyolasyon dwa moun sa kap fèt kay vwazen an.

Desizyon Repiblik Dominikèn pran pou chase pa pil e pa pakèt Ayisyen kap viv lakay yo parèt tankou yon gwo skandal pou OJNUA ki regwoupe 11 peyi sou kontinan Afrik la. Òganizasyon sila mande tout enstans ki nan mond lan leve kanpe pou fè Repiblik dominikèn tande rezon apre desizyon gwogonm li pran pou depòte 10.000 Ayisyen chak semèn sa. Yon bò,OJNUA kalifye desizyon sa vyolasyon dwa migran Ayisyen yo epi yon lòt bò, li mande otorite kap gouvènen Peyi Dayiti yo pou pran bon jan dispozisyon epi kreye bon jan kondisyon pou pitit peyi a kapab viv lakay yo nan lapè.

Minis Zafè Etranjè Peyi Dayiti, Dominique Dupuy kalifye desizyon Repiblik dominikèn tankou yon gwo afwon ak diyite moun epi montre endinyasyon l fas ak sitiyasyon konpatriyòt yo twouve yo.

pascalfleuristil2018@gmail.com