KPT: Tonton Sam felisite dènye desizyon ki pran nan laprezidans tounant lan

Nan yon nòt ki pibliye sou kont X Anbasad Etazini kèk tan apre enstalasyon Leslie Voltaire kòm nouvo Prezidan konsèy Prezidansyèl Tranzisyon (KPT), peyi Etazini felisite desizyon sa e di l prè pou kontinye travay ak strikti sa.

Reprezantan Fanmi Lavalas nan KPT a, Leslie Voltaire pran tèt ògan Prezidansyèl sila nan yon kontèks kote twa konseye ap benyen nan kòripsyon dapre yon rapò ULCC pibliye. Pozisyon rès manm KPT yo ki eksprime atachman yo ak Konseye-prezidan Louis Gérald Gilles, Smith Augustin ak Emmanuel Vertilaire malgre non yo site byen fon nan rapò a lakoz Edgard Leblanc Fils pa mete mete pye l nan seremoni enstalasyon Leslie Voltaire.

Malgre tout kontestasyon ki genyen nan nivo ògan Prezidansyèl la, Peyi Etazini pote sipò l bay KPT a apre enstalasyon Leslie Voltaire a nan yon nòt Anbasad Etazini nan Peyi a sòti ayè lendi 7 oktòb la. « Peyi Etazini felisite Konsèy Tranzisyon Prezidansyèl la pou angajman li an favè yon tranzisyon pasifik pouvwa a. Nou espere kontinye travay ak KTP a pou konstwi yon pi bon avni ke Ayisyen yo merite » , se sa nou ka li sou kont X Anbasad la.

Nap siyale kò diplomatik la tankou Etazini ak Lafrans te reprezante pa 2e anbasadè yo nan enstalasyon Leslie Voltaire kòm nouvo Prezidan konsèy Prezidansyèl Tranzisyon an. Nan yon mesaj anbasad Lafrans poste sou kont X li salye enstalasyon Leslie Voltaire nan tèt KPT a epi enfòme se chaje dafè anbasad Lafrans nan peyi Dayiti ki te reprezante yo.

pascalfleuristil2018@gmail.com