RENTRHED voye jete envite dine Minis Edikasyon an nan okazyon jounen mondyal anseyan yo

Regwoupman Nasyonal Travayè Ayisyen nan Edikasyon (RENTRHED) salye tout manm, patizan, ak sipòtè li yo nan yon moman kritik kote òganizasyon an ap mobilize kont neglijans leta Ayisyen an nan satisfè revandikasyon anplwaye edikasyon yo.

Nan yon lèt ki soti nan men Junior Léo, prezidan RENTRHED la, fè konnen li deside refize envitasyon Minis Edikasyon Nasyonal la, Augustin Antoine, ki te envite li patisipe nan yon dine jodi a, nan Hotel Karibe, nan kad selebrasyon Jounen Mondyal Anseyan yo. Desizyon sa a te pran paske, dapre Léo, moman an pa apwopriye pou patisipe nan yon aktivite konsa pandan òganizasyon an ap fè presyon pou fòse leta satisfè plizyè revandikasyon ki gen anpil enpòtans pou travayè edikasyon yo.

Prensipal Revandikasyon yo Enkli:

1.  Bay kat debi pou tout anseyan ak administratè yo;
2.  Ajisteman salè pou anplwaye nan sistèm edikasyon an;
3.  Nominasyon pèmanan pou tout anseyan ak administratè ki nan sistèm lan;
4.  Peye tout aryere salè yo;
5.  Alinye salè pou anplwaye ki travay nan Direksyon Depatmantal yo;
6.  Peye tout kontraktyèl ki te nome men ki poko janm resevwa yon santim.

Junior Léo kritike Minis Edikasyon an ki refize pran an konsiderasyon kaye revandikasyon òganizasyon an ki te deja voye bay li. Malgre plizyè rankont avèk Minis la, li kontinye inyore demann travayè yo epi pito li fè leson kòm sosyolog, esplike pwòp eksperyans li kòm si li te sèl moun ki te pran wout lekòl nan peyi a. RENTRHED ap kondane atitid sa a ki montre yon mank de respè pou kad ak pèsonèl ministè a.

Mete sou sa, Junior Léo fè konnen bidjè ki sot pase a, ki te adopte nan Konsèy Minis, pa prevwa okenn avantaj pou anplwaye Ministè Edikasyon Nasyonal ak Fòmasyon Pwofesyonèl (MENFP) yo. Ministè a kontinye lwe ti lokal nan plizyè kwen, pandan direktè lise ak lekòl nasyonal yo nan Pòtoprens ap fè fas ak difikilte pou jwenn lokal pou kontinye fonksyone. Léo raple tou ke, malgre pwomès leta pou bay paran elèv yo yon sibvansyon 20,000 goud, pyès paran poko resevwa okenn lajan nan moman sa a.

Daprè Junior Léo, RENTRHED te oblije pran distans ak tout inisyativ kote enterè pèsonèl edikatif la neglije. Òganizasyon an rete detèmine pou kontinye mobilizasyon li jiskaske tout revandikasyon travayè yo jwenn repons konkrè nan men otorite yo.

duverneguyno@gmail.com