Ofis pwoteksyon sitwayen reyalize yon atelye refleksyon sou pwoblematik lang kreyòl nan distribisyon lajistis la an Ayiti

Se anba tèm ” Itilizasyon lang kreyòl nan lajistis se garanti respè dwa ak diyite tout sitwayen “, Ofis Pwoteksyon Sitwayen òganize jodi jedi 22 fevriye 2024 la, yon atelye refleksyon sou pwoblematik itilizasyon lang kreyòl la nan distribisyon lajistis an Ayiti. Aktivite sila a reyalize nan okazyon selebrasyon lang matènèl ayè mèkredi a.

Seremoni sila a te dewoule nan sal konferans Victor Benoit nan OPC, an prezans pèsonalite nan divès sektè, pami yo, pwotektè sitwayen an, Mèt Renand Hedouville , rektè inivèsite leta a Fritz Deshommes, plizyè reprezantan divès òganizasyon kap defann dwa moun elatriye….

Nan diskou li pou okazyon an, pwotektè sitwayen an souliye, aktivite sila ki gen pou objektif bay lang kreyòl la jarèt nan sektè lajistis la , dewoule nan yon moman kote anpil moun pa sispann kritike jan lajistis ap fèt nan peyi a, pandan l souliye jan dwa moun pa sispann vyole nan tout nivo. Yon lòt bò, pwotektè sitwayen fè remake baryè lengistik ki genyen nan sektè lajistis kote lang kreyòl la, ki se lang matènèl nou, pa valorize.

Mèt Renand Hédouville pwofite bat bravo lakontantman pou inisyativ Rektè inivèsite leta Dayiti a Fritz Deshommes pran pou mete yon Chè nan fakilte dwa ak syans ekonomik, nan lide pou kapab fòme pwofesyonèl dwa yo pou la lajistis la rive fèt an kreyòl nan avantaj tout moun patikilyèman jistisyab yo. Mesye Hédouville pwofite salye tout lòt patnè kap travay ak rektora a pou pèmèt kreyòl la vin gen yon plas enpòtan nan tout domèn nan peyi a.

Rektè inivèsite leta a Fritz Deshommes salye aktivite sa OPC reyalize nan lide pou lang kreyòl la rive entegre sektè lajistis la nan peyi a. Li pwofite fè konnen komite ki konpoze chè kreyòl la nan fakilte dwa ak syans ekonomik la, ap kontinye travay san kanpe pou rive fè lang kreyòl lan tounen yon zouti enpòtan nan lajistis la an patikilye.

Diskou a pat diferan bò kote vis prezidant akademi kreyòl ayisyen, madam Rogeda Dorce Dorcile, ki ajoute se yon ane istorik pou jounen lang manman nou an Ayiti apre desizyon otorite nan inivèsite leta pran pou kreye chè kreyòl sa nan fakilte dwa a. Vis prezidant lan raple tout batay akademi pat sipann mennen bò kote pal nan kad pwojè sa depi 10 lane ki vin yon reyalite jodi a. Li saslye jèfò tout enstisyon kap batay pou bay lang kreyòl la pran jarèt nan divès sektè nan peyi a.

Nap souliye, komite ki konpoze chè kreyòl s sila a regwoupe enstitisyon tankou , Fakilte dwa ak Syans ekonomik, Ekòl majistrati, Akademi Kreyòl Ayisyen, Fakilte Lengistik Aplike, Ofis Pwoteksyon sitwayen poun site sa yo sèlman.