MENFP mande tout aktè yo kontinye mobilize pou fè respekte dwa timoun pou yo ale lekòl.

Nan okazyon jounen mondyal timoun yo, ki selebre chak 20 vovanm. Ministè Edikasyon Nasyonal ak Fòmasyon Pwofesyonèl ( MENFP ),envite tout aktè ak patnè li yo kontinye mobilize epi aji pou fè respekte dwa timoun yo genyen pou yo ale lekòl nan kèlkelanswa sikonstans lan.

Ministè a fè konnen, lekòl paka tann se responsabilite chak sitwayen ak sitwayèn, responsab Leta, òganizasyon sosyete sivil la, kominote edikatif la, patnè finansye ak teknik. Pou mete tèt ansanm pou pwoteje dwa timoun yo.

MENFP vanse pilwen pou li di, pa dwe gen menas ni atak kont lekòl. Li mande sosyete a, akonpanye timoun yo epi ede yo ale lekòl, paske lekòl se sèl chimen pou bati avni yo ak reyisit yo. Edikasyon se pi gwo zouti pou devlopman timoun yo ak peyi a.

Edikasyon Nasyonal, yon lòt fwa, mande tout moun pote kole nan gwo konbit sa a pou pwoteje timoun yo epi akonpanye yo tounen lekòl. Li raple se nan lane 1945, ONU te kreye jounen mondyal timoun yo. Chak 20 Novanm, yo selebre jounen sa nan fè pwomosyon pou respè ak dwa timoun. Se nan menm 20 novanm sa a, ONU te adopte deklarasyon sou dwa timoun yo nan lane 1959 epi siyen konvansyon sou dwa timoun yo nan lane 1989. Bò kote pa Ayiti, konvasyon sila te ratifye nan lane 1994.

MENFP pwofite fè konnen lap travay sou yon nouvo kalandriye adapte pou ane lekòl 2022-2023 a kap chita sou tout pwoblèm nou jwenn nan peyi a epi tout aksyon ki dwe mennen pou akonpanye elèv yo nan founi sipò pou kore aprantisaj yo. Ministè an kontinye mande kout men pou tout timoun reprann chimen lekòl, menm si se tipa tipa.

Roubens Vil
Vilroubens@gmail.com