Ayiti-Edikasyon: Selebrasyon 56èm jounen entènasyonal alfabetizasyon.

Ministè Edikasyon Nasyonal ak Fòmasyon Profesyonèl,selebre yè jedi 8 sektanm 2022 an,56èm jounen entènasyonal alfabetizasyon an,seremoni sa te dewoule nan Petyonvil, te gen plizyè dizèn aprenan ki sòti nan divès alfabetizasyon nan peyi a. Nan okazyon sa aprenan yo te tou profite fè wè pwogrè yo reyalize nan koze  “konn li ak ekri” nan kèk mwa yo te pase anndan sant alfabetizasyon sa yo.

Aprenan sa yo, majorite ladan yo gen plis pase 50 lane, yo te chante de mòso an kreyòl nan im nasyonal drapo peyi a, epi li an kreyòl mesaj direktris jeneral UNESCO a,Madan Audrey Azoulay,te bay nan okazyon 8 septanm nan. Asistans lan te kontan epi apresye demonstresyon sila.

“Alfabetizasyon se pa yon tan pèdi. Alfabetizasyon se respekte dwa yon kategori moun genyen nan sosyete a, dwa pou yo konn li ak ekri anmenm tan,alfabetizasyon se envestisman nan yon bann konesans kategori moun sa yo genyen deja,sa ki kapab ede yo transmèt konesans sa yo pi byen” se deklarasyon minis Nesmy MANIGAT te fè pandan li tou profite nan okazyon sa pou l salye jefò moun sa yo.

Nan okazyon sa sekretè deta alfabetizasyon an te tou profite bay kèk reyalizasyon li pandan sis dènye mwa yo, tankou  siyati pwotokòl ak asosyasyon pou louvri 1 300 klas Alfabetizasyon. Nan menm peryòd sa, biwo a fòme 300 monitè a sipèvizè nan Grandans, Nòdwès, Lwès, yo evalye 2000 aprenan epi sètifye fòmasyon pou plis 1300 ladan yo.

Rektè UEH lan te pale konsa.

‘’ se ta yon maryaj ant Alfabetizasyon ak Edikasyon. Kijan alfabetizasyon an ka entegre nan  Edikasyon pi laj ki dwe ale pi lwen pase aprann li ak ekri. Yon rapèl vizyon manman lwa peyi a ki mande yon veritab kanpay alfabetizasyon ki enplike leta ak tout sektè nan peyi a olye nap konte 500 mil, 300 mil,10 mil moun nou aprann li ak ekri chak ane. Nou tap pi kontan ankò lè gen dispozisyon ki pran nan menm jounen an pou enstale yon  komisyon  enstisyonèl pou Edikasyon nonfòmèl la”, se sa rekté UEH la Fritz Deshommes mande. Rektè a  tou profite pou li anonse yo pap chita gade sèlman,yap pote patisipasyon pa yo nan konbit sa, jan manman lwa peyi mande a pou desitire moun ki pa konn li ak ekri nan peyi a.

Nan dat kite 20 oktòb 2020 an, lè UEH la te siyen ak sekretè deta alfabetizasyon an yon protokòl akò ki prevwa anpil nan pwen sa yo. Pandan rektè an fè konnen etidyan nan Pòtoprens kou pwovens ap prepare yo pou patisipe nan kanpay alfabetizasyon an.  Pwofesè yo tou pare pou ankadre tout pwogram alfabetizasyon ak Edikasyon non fòmèl kap pèmèt moun yo konn li ak ekri nan yon metòd pratik.

Minis MANIGAT enstale komisyon  enstisyonèl la.

Premye sitwayen Ministè an enstale komisyon  enstisyonèl pou Edikasyon non fòmèl la, komisyon an gen 20 manm ki reprezante plizyè Ministè ak lòt enstityon piblik. Nan komisyon sa tou genyen reprezantan kèk ajans nasyon zini, objektif komisyon sa se fasilite dyalòg ant tout antite ki enplike nan alfabetizasyon ak Edikasyon non fòmèl la.

Nan non komisyon an, Guerda Previlon swete gen plis jefò ki fèt sou Edikasyon non fòmèl la ki dwe tradwi nan reyalite popilasyon an.

Roubens VIL