Ayiti : Nou sou chimen yon lòt Bwa Kayiman

Nan lannwit 22 pou rive 223 dawout 1791 esklav yo te lanse premye revòlt la kont sistèm eksplwatasyon fòs kouraj moun ki te genyen sou latè nan epòk sa. Sistèm esklavaj la.

E se apati aksyon sa kote nan rejyon Nò peyi a, modòd la te bay pou sabote sou tout fòm plantasyon yo, mete dife, pwazonnen ak tout lòt aksyon k ap anpeche kolon yo kontinye “sèvi ak nou tankou choz”.

Wi se te nan Nò kòlè nou te kòmanse monte. Jodi 22 dawout 2022 a, pou n lave san tout moun, tout pitit pitit bosal yo k ap sibi tout zak ensekirite anba men ak anba je newo kolon yo, pou n ranmase san fanmi Desanclos  ki soti nan Toyo moun nan Nò kote kòlè nou menm bosal yo te premye fè santi, konsa soti Jeremi,  antre Okay, pase Miragwan, Tigwav, pou monte Jakmèl, debouche sou Leyogann nan lakou Anacaona,  pou n mache sou Pòtoprens ki tounen Port au Crime kote n ap kanpe fèm.

Kote  nap gonfle tout fòs nou, tout Enèji nou N ap rantre Kafou pou n  fè le plein sa vle di

Pou tout pèp Kafou a nan yon seremoni

Ochan kote y ap fè tout rit yo konnen pou louvri mach pou Lavi a pou nou rive dechouke  tout Malfektè yo.

Kote Nap di tout

Madigra ki rele :

G9 ak alye

Je Pèp.

PHTK

Tout sila yo

Ki ayè t ap di nou

Barikad se avni nou

Epi kounye a

Se pi gwo trèt nan

Akò 11 septanm 2021

Yon Akò

Akwòkò

Pou yon Gouvènman apeze

K ap apeze pòch yo, fanmi yo, zanmi yo nan pèmèt yo fè milyon sou san Inosan nan 4 kwen peyi a.

Kote SDP, Fusion, MTV, Inite, Verite, ak tout lòt yo kontinye nan tèt ansanm ak PHTK operasyon wete trip mete pay sou peyi a lè yo pa janm mande sa k ap fèt pou viktim 13 masak yo, sa ka p fèt kont dechèpiyè Petwo karibe yo (Kotkòbpetwokaribeya),

Sa kap fèt kont gwo palto CIRH yo ki disparèt lajan rekonstriksyon peyi a apre Goudougoudou 12 janvye a.

Pou diyite n ki lote nan mache nan Sendomeng, Etazini, Lafrans ak tout lòt peyi kote reprezantan PHTK ak alye l yo nan Gouvènman Apeze a fè tout misyon diplomatik yo tounen boutik nan fè tout tranzaksyon sal tankou yo menm yo sal sof yo pa defann enterè peyi a ak enterè Ayisyen k ap viv nan zòn sa yo. Sendomeng, Chili, Brezil, Etazinii,  nou tout tande ak wè konpòtman anpil nan diplomat sa yo.

Nap kanpe Matisan pou nou fè Sendika Core Group la, ak BINUH plis nouvo Gouvènè Antonio Guterrez fenk nonmen an, konnen nou bouke, nou fout bouke.

Fwa sa nou rive, n ap desann anyen pap kanpe nou.

22 dawout 2022 a dwe premye jou, pou yon lòt liberasyon Ayiti nan nouvo kontèks mondyal la.

Ayisyen nan Nò kote nou te premye fè konnen kòm bosal nou pat dakò rete ak chenn nan pye nou ;

Ayisyen nan Lwès kote machin lanmò a pèdi fren nèt, kote kriyote a pa gen parèy ditou ;

Ayisyen nan Lès kote Solèy la leve pou chofe nou, pou klere  lavi, pou fè konnen nou se moun tankou tout lòt moun sou latè ;

Ayisyen nan Sid kote tankou nan Kan Jera nou te rasanble an n rasanble jodi 22 dawout 2022 a. Ann mete fòs nou ak fòs tout rès peyi a pou

Ansanm nou di :

Core Group, BINUH,

Joe Biden

Nou vle lavi

Nap defann lavi

Nou vle Viv nan peyi nou

Nou vle viv an n Ayiti

Aba Tout trèt

Aba tout Konze

Aba gouvènman Ariel Henry ak alye l yo.

Se yon  22 dawout 1791, tankou jodi a, nan Bwa Kayiman, bosal yo ki se gran gran paran nou te kòmanse ekri ak san yo pi bèl paj listwa epòk n ap viv la.

Nou menm pitit pitit yo,  jodi 22 dawout 2022 a nou vin montre lemond nap refè l ankò.

Marcel Poinsard Mondésir

22 dawout 2022.-