Ki Moun Ariel Henry ye?

Politisyen Ayisyen.

Rize pase l pa genyen.

Yon dous, yon cho.

Pawòl Rat mòde soufle a 

Sanble kon degoutdlo 

Ak mouche Ariel Henry

Nou kapab wè sa nan Konpòtman l. Li fè kòmsi l vle Negosye. E poutan, anba, anba

l ap tòdye negosyasyon. Tanzantan youn nan lyetnan yo lage yon pawòl piman bouk pou vèni moun k ap chita ak yo. Ou byen li gen yon « jounalis » ki tizonnen yon moun nan ekip la ak yon kout jounal. Kolonèl Rébu konn byen sa nou di la.

Doktè, Premye minis Ariel Henry ap wonje w, ap fini ak ou tankou kreyon, pandan l ap pase men nan tèt ou, l ap karese w, yon fason pou w pa pote atansyon sou move aksyon l ap poze yo. Li aji yon mannyè pou w toujou di se moun ki ak li yo ki pa vle l pran desizyon kòrèk, poze aksyon tout bon pou kwape kidnapin lan.

Sa n tande nan lari a. Minis Enteryè se kidnapè, se pwoteje bandi.

Minis Jistis la nan konfyolo ak bandii. Moun nan kabinè l fè lage mèt bato ki pote pil minisyon ak zam anndan peyi a. Tout pawòl sa yo se laverite san mank.  Men nou tout bliye mouche Ariel Henry se li menm ki nonmen tout otorite atoufè yo. Se sitou Ariel Henry ki premye chèf Konsèy Siperyè Polis Nasyonal la. Konsa lòd li yo IREVOKAB. 

Sa vle di, si Doktè Premye minis la te pase lòd tout bon pou mache pran tout kalte bandi, pou bon jan ankèt fèt sou tout krim finansye ak masak yo, pa gen minis enteryè, pa gen minis jistis, pa gen sekretè jeneral palè nasyonal ki ta kapab kanpe an kwa kont desizyon yo. Nou tout konnen prensip « l’autorité de nomination c’est elle aussi l’autorité de révocation ». Konpòtman mouche Ariel Henry nan anpil dosye k ap make pa sou plas sanble ak pawòl pèp ki di: « si pa gen sitirè, pa fouti gen vòlè ». Epi tou, « il n’y a pas de corrupteurs sans corrompus ». Pou pi piti fók gen 2 Moun pou fè dyalòg. Sa k vle konprann na konprann.

Nan estil rat mòde soufle Ariel Henry a, mete sou sa, mesyedam nan peyi DAyiti ki pa janm demisyone nan djòb yo, konsa ou toujou nan kase fèy kouvri sa. Atitid sa, toujou fè chèf la, moun ki nan tèt piramid la pase pou yon bon papa, sitou lè chèf sa toujou ak kostim manfouben l sou li tankou mouche Ariel Henry. 

Se konsa mouche Ariel Henry, Doktè Premye minis Advantis setyèm jou ap fini ak peyi a, ap wete chè sou nou ak tout konsyans li, tout nanm li, ap defèt tout sa k pou ede peyi a pran wout pwogrè ak devlòpman, ap kase tout tradisyon ak kilti peyi a ak desizyon dwategòch li, nou menm n ap kontinye ba li « absolution sans confession » sou baz li se yon bon sitwayen, li se Yon bon pwofesyonèl, se moun ki ansanm ak li yo ki pa vle l evolye. Atitid jeneral nou menm pèp genyen ak tout dirijan yo. Se pou sa nou nan lòbèy nou ye la.

Moman rive pou nou fikse responsablite yo. Yon otorite nan nivo Premye minis, Prezidan pa yon ti bebe, pa yon tinedyè, pa yon maryonèt moun ap telegide. Se yon moun ki gen tout kapasite l, tout dwa grandèt li. Tout aksyon l poze li konn poukisa li poze yo, li konn ki enterè li genyen ladan yo e sitou li konnnen kisa l ap tann kòm retombe, kòm konsekans aksyon an. An nou wete gwo kouch lasi ki bare je nou an, ki fè nou kontinye ap bay mouche Doktè Newològ Premye minis Ariel Henry « absolution sans confession ». Premye minis Ariel Henry se yon moun ki vaksinen, ki benyen, epi ki chanje kazak sou li.

« À bon entendeur salut »!

Marcel Poinsard Mondésir