Ayiti-Ensekirite : Plis pase 50 moun mouri nan konfli zam ki pete ant gwoup gang G-9 ak G-Pèp nan komin Site Solèy
Yon konfli gang ame pete nan komin site Solèy ant gwoup gang G9 ak G-Pèp depi vandredi 8 jiyè 2022, bò 6zè nan maten. Selon enfòmasyon ki rive jwenn sal redaksyon Impulse Web Medias (IMW), gè sa ki pete a gentan fè anpil viktim nan mitan popilasyon sivil la, sitou moun kap viv nan zòn pwojè Dwouya, Bwa nèf ak Belekou.
Laguerre Litainé, yon jenn etidyan 24 lane kap viv nan komin nan fè konnen depi vandredi pase anpil moun pran bal nan vant, nan kou, nan pye, elatriye. Gen moun ki oblije abrite yo pou bal mawon pa pran yo nan zòn dèyè mi. Fòk nou raple nou konfli sa ki retounen nan pi gwo bidonvil peyi Dayiti aprè kèk lane te genyen yon lapè anndan site a dire plis pase de (2) lane nan komin nan, nan lide pou gang sa yo rive okipe pi plis teritwa nan Site Solèy.
Jèn etidyan an lanse yon rèl nan zòrèy otorite yo pou fè yo konnen popilasyon an pa gen manje, pa gen dlo. Akoz kout zam ki pa sispann chante, kamyon dlo pa vle vin bay dlo, menm moun ki gen kèk ti boutik pè louvri. Popilasyon an paka respire ankò.
Sitwayen an fè konnen tou komin site Solèy ap konfwonte ak anpil kalte pwoblèm kote depi plis pase 2 lane, komin nan pa gen wout, pa gen kouran, pa gen dlo. Depi lè gè sa kòmanse anpil moun nan popilasyon an pat kapab rive sòti pou ale nan aktivite yo. Tout moun te oblije fèmen kò yo anndan kay. Tout pwojè oblije kanpe anndan komin nan akoz kout zam kap chante vire tounen anndan komin nan.
Nap fè sonje tou, sa prèske genyen yon lane depi nèg ak zam te anvayi divès antèn polis nan divès zòn ki anndan komin nan. Depi lè sa pa vrèman genyen yon prezans polisye pou sekirize popilasyon an.
