Nòdwès / Anviwonman : Meri Pòdepè nan tèt kole ak biwo pwoteksyon sivil òganize yon atelye refleksyon sou sezon siklonik lan.
Responsab Pwoteksyon Sivil, branch Nòdwès, atravè yon atelye refleksyon avèk divès pèsonalite nan sosyete sivil la, ayè mèkredi 01 jen 2022 an, Agr José Réthone, deklare daprè previzyon Meteyowolojik, peyi Dayiti ap konnen 19 evènman ki pataje konsa :10 tanpèt / 9 ouragan.
Nan sak gen pou wè ak preparasyon , responsab la fè konnen l pako fin wè klè akoz lantè li di ki genyen bò kote pouvwa santral. Pandan l kwè sa pa anpeche yo kontinye sou menm pratik anvan yo. Li mande pou popilasyon an veyatif anpil, sa vle di koute radyo, suiv tout konsin otorite yo.
Daprè responsab Teknik Pwoteksyon Sivil nan Nòdwès, Agr Rhethone José ki te adrese l ak agrikiltè yo, elvè yo, peyizan yo, li mande pou yo veye bèt yo ak janden yo ki se kanè bank yo.
Men youn nan otorite rejyonal sila yo pat di anyen sou kisa yo konte fè pou popilasyon ki sitou rete nan zòn ki gen risk yo, ki repons yo kapab pote si tout fwa ta genyen danje sou depatman an nan sak gen pou wè ak inondasyon, glisman teren elatriye.
Nap raple Sezon siklonik lan kòmanse 01 jen pou rive 30 novanm. Menm si tout lòt peyi toujou gentan pare pou fè fas ak nenpòt katastwòf natirèl kap vini, nou menm pa bò isit, se toujou gwo tèt chaje lè nou nan sezon siklòn paske peyi Dayiti vilnerab anpil nan sak gen pou wè ak katastwòf natirèl.
Robens Aristilde
Impulse WebMedias
