Lang kreyòl, zouti enpòtan pou travayè laprès yo

“Wòl ak plas lang kreyòl nan metye jounalis” se anba tèm sa yon gwo chita pale te fèt jou ki te 24 oktòb 2021 nan kad selebrasyon lang kreyòl ak kilti kreyòl. Jean Baptiste Anivince ( Jan Batis Anivens) ak Iléus Papillion ( Ileis Papiyon) se te 2 intèvenan yo.

Nan yon anbyans zanmitay konferansye yo Jean Baptiste Anivince ak Iléus Papillon te pale sou gran avanse kap fèt sou lang kreyòl la swa nan literati, inivèsite nan edikasyon e menm nan lasyans ak radyo. E li te pale tou sou enpòtans lang kreyòl nan radyo pandan li te raple youn nan prensipal misyon laprès genyen ki se enfòme ” Li vrèman enpòtan pou lang kreyòl la pran yon plas nan radyo yo” se te deklarasyon Anivince.

Yon lòt bò, konferansye yo te pale sou fason moun yo ap pale ak ekri lang kreyòl yo jije ki fèt mal. Pandan yo ankouraje pou tout ayisyen, entèlektyèl tout kalte moun pwodwi plis nan lang kreyòl la epi konseye tout moun al li dènye rezolisyon “Akademi lang kreyòl” la sa ki ap pèmèt nou pèfeksyone ekriti yo.

Fòk nou souliye tou konferans sila fèt nan kad seri aktivite ÉCOLE DE LA RADIO makònen ak CEPROFOJUL ap fè pou make selebrasyon lang ak kilti kreyòl pou ane sa a. Yon lòt bò òganizatè yo fè konnen genyen yon ansanm lòt aktivite ki gen pou fèt pou ka bay Lang kreyòl la plis jarèt. Nan sans sa a, direskyon ÉCOLE DE LA RADIO ak CEPROFOJUL deside kole zepòl ak Festival Entènasyonal Literati Kreyòl kap fèt ane sa a, soti premye pou rive 5 desanm 2021.

Derby LIZAIRE