Ayiti / Ijans sanitè :Medic Haïti rele osekou.

Pa genyen Oksijènn nan lopital yo, malad Covid-19 yo nan gro difikilte.

Sitiyasyon sa rive akoz pwoblèm gaz ki gen nan peyi a depi plis pase 2 mwa. Lopital yo pa gen mwayen pou fè apwovizyonman oksijènn pou pran anchaj malad ki gen difikilte pou respire yo sitou sa ki gen fòm grav Covid-19 la.

Nan sans sa Medic Haïti ap rele osekou pou malad yo. Bay lopital yo yon chans pou yo fonksyone.

Pa bliye lopital yo bezwen gaz pou yo fonksyone. Sal operasyon yo bezwen gaz pou yo fonksyone. Laboratwa yo bezwen gaz pou yo fonksyone.

Mete sou sa a, lopital yo pa kab fè achte oksijèn pou malad Covid-19 yo.

Pa bliye nan moman sa yo, sitou avèk nouvo varyan yo ki genyen nan peyi a, gen anpil malad Covid-19 ki bezwen oksijèn pou pran swen malad yo.

Bagay yo tèlman difisil pou lopital yo sitou pou sant trètman Covid-19 yo, gen anpil ki oblije fèmen pòt yo. Tankou lopital St Jude, lopital Dèlma 2 , ak plizyè lòt ankò.

Poutan ka Kovid yo retounen ap monte anpil anndan peyi a.

Nap fè sonje si sitiyasyon sa kontinye konsa , peyi a riske konnen yon gwo katastwòf sanitè. Paske lopital yo paka fonksyone akoz pwoblèm sekirite, melanje ak pwoblèm gaz , men kounya lopital yo paka jwenn oksijènn pou pran swen malad Covid-19 yo.

Peyi Dayiti se kriz sou kriz, anpil moun ap mande jous kilè peyi a ap sòti nan sitiyasyon sa a. Ann vole osekou lopital yo pou n sove lavi malad yo.

Ulysse Jean Chenet