Rate Gaz: Pòtoprens leve anba gwo tansyon jedi 21 oktòb la
Plizyè kote nan Pòtoprens leve maten jedi 21 oktòb la anba gwo tansyon. Mouvman pwotestasyon fèt nan divès kwen akoz ratman gaz ki genyen sou mache a. Anpil kote nan kapital la te genyen kawotchou k ap boule. Pwotestatè yo bare wout la epi tire kout wòch pou mande otorite yo pran responsabilite yo.
Anpil sitwayen eksprime prewokipasyon yo poutèt ratman gaz ki genyen nan peyi a depi plizyè jou. Chofè moto yo nan Dèlma 30, 47, 73 ak 75 deside mete pye yo atè. Yo denonse ratman gaz ki genyen nan ponp yo. Poutan l ap vann byen chè kèk kote nan lari a.
Sitiyasyon an pa diferan nan kèk vil pwovens. Nan komin Jeremi popilasyon an pran lari pou . Yo kritike moun k ap vann galon gaz la mil senk san (1 500) goud. Daprè yon repòtè Zenith FM, ponp yo pa t ouvè ditou jodi a nan Jeremi.
Nan zòn Tomasen se menm pwoblèm nan. Popilasyon an bloke wout la soti 46 pou rive 48. Galon gaz la ap vann mil senk san (1 500) goud nan zòn sa.
Nan zòn Divivye, prensipalman wout 9 lari a bloke. Pwotestatè yo denonse pri galon gaz la k ap vann mil de san senkant (1 250) goud. Se sèlman anbilans ak moun malad ki ka pase.
Pwoblèm gaz sa la depi kèk mwa nan peyi a. Pi fò ponp yo fèmen pòt yo. Kote ki deside ouvè yo vann galon ak byen chè. Otorite yo poko pran okenn mezi epi yo pa di anyen pou konbat fenomèn sa. Nan yon peyi kote tout bagay moute tèt nèg. Chofè moto yo menm menase pou boule ponp yo si leta pa di anyen sou sa. Jiskilè pwoblèm sa ap fini? Pèsonn pa konnen.
