Jakmèl-Minisipalite : Yo rive jwenn kadav yon ti bebe sou yon pil fatra Bodwen.

Maten mèkredi 13 oktòb 2021 an, ti machann kap vann pwodui tout kalte pi ba devan mache kominal Jakmèl lan ki chita nan lokalite Bodwen, leve jwenn kò yon ti bebe, sèks li se yon ti gason.

Mouch anvayi l sou yon gwo pil fatra santi ki gen plizyè mwa kap degaje move lodè, mouch, vè, mele ak dlo pwason, dlo vyann, matyè tonbe bèt, sachè twalèt, san konte abitan nan lokalite a ki ranmase fatra domestik bwat katon fè kenken, mele ak moun ki vin vide fatra nan machin lèswa.

Daprè sa yon moun ki abite nan zòn lan t ap esplike se yon kalvè fanmi l ap monte lè chen vini deboure fatra a, lè swa van an pote sant lan ba yo anndan lakay yo.

“Ah ! Se pam map pran ak sant fatra sa a, rele lameri yo pa okipe nou, m oblije bat pou m gen yon spre santi bon 24 sou 24. Sa pa ase lè mwen respire lodè an rete nan gòj mwen anfen”.

Plizyè espektatè ki te an kòlè ki tap gade kò ti bebe an ki lonje tou wòz sou do sou pil fatra a kote mouch anvayi l tap opine ak move pawòl kont jenn fanm sankoutya sa ki fè aksyon malonèt sa. Dlo nan je, yon manman di ou pa konn sa l t ap ye demen, gade sa a yon fanm fè pitit ki soti nan zantray li. Li ta kenbe l li bay yon prochen ki kapab okipe l.

Jounalis Francky Célestin ki t ap pase nan zòn lan ki t ap gade te lanse yon apèl prese prese nan emisyon li anime ki se ‘’Alèt’’ ak otorite Brigad Pwoteksyon Minè (BPM), ofis pwoteksyon sitwayen (OPC), afè sosyal, la Meri, Delegasyon Sidès, pou kouri gade si l pa mouri pou yo ta ede l jwenn lavi.

Impulse Web Medias te depeche yon jounalis sou plas, pèsòn pami otorite nou sot site la yo pa t mete pwent pye yo.

Sa k te lakòz kèk ti machann ki vann pwodui kosmetik arebò pil fatra santi an te blije pran pèl ak bale, voye fatra ki desann nan espas kote yo konn vann lan sou kò ti lèzanj lan.

 

 

Marcia MOĪSE

moisemarcha@gmail.com